ഇളം കരിക്കിന്റെ കുളിരനുപമം,
ഇളനീരതിന്റെ മധുരമുന്മേഷം,
നാളികേരം, അമൃതമാണെന്റെ,
കേരള നാടിതു ദേവരാജ്യവും! - ഇന്ദു -

Friday, August 29, 2008

ഭൂമിയിലെ ഏറ്റവും ആരോഗ്യദായകമായ എണ്ണ

നിങ്ങളെ ഹൃദ്രോഗം കാൻസർ മുതലായ നാശകാരികളായ രോഗങ്ങളിൽ നിന്ന് സംരക്ഷിക്കുകയും, നിങ്ങളുടെ ദഹനം മെച്ചപ്പെടുത്തുകയും, നിങ്ങളുടെ പ്രതിരോധശേഷി വർദ്ധിപ്പിക്കുകയും, നിങ്ങളുടെ അമിതവണ്ണം കുറയ്ക്കുകയും ചെയ്യുന്ന ഒരു പാചകയെണ്ണ ഉണ്ടെങ്കിൽ, നിങ്ങൾ അത് ഉപയോഗിയ്ക്കുവാൻ തയ്യാറാണോ? ഇതാണ് വെളിച്ചെണ്ണ നിങ്ങൾക്ക് വേണ്ടി ചെയ്യുന്നത്.

വെളിച്ചെണ്ണ ചെയ്യാത്തത്

  • രക്തത്തിലെ കൊളസ്ട്രോൾ കൂട്ടുന്നില്ല.
  • രക്തം കട്ടപിടിയ്ക്കുന്ന പ്രവർത്തനത്തെ ത്വരിതപ്പെടുത്തുന്നില്ല.
  • അതീറോസ്ക്ലീറോസിസ് അല്ലെങ്കിൽ ഹൃദ്രോഗത്തെ നല്കുന്നില്ല.
  • തൂക്കം കൂട്ടുന്നില്ല.
വെളിച്ചെണ്ണ ചെയ്യുന്നത്
  • അതീറോസ്ക്ലീറോസിസിന്റേയും ബന്ധപ്പെട്ട രോഗങ്ങളുടേയും അപകടസാധ്യത കുറയ്ക്കുന്നു.
  • കാൻസർ മുതലായ മാരകരോഗങ്ങൾ ഉണ്ടാകുവാനുള്ള സാധ്യത കുറയ്ക്കുന്നു.
  • ബാക്ടീരിയ, വൈറസ്, ഫംഗസ് മുതലായവയിൽ നിന്നും ശരീരത്തെ പ്രതിരോധിയ്ക്കുന്നു.
  • ശരീരത്തിന്റെ പ്രതിരോധപ്രവർത്തനങ്ങളെ സഹായിയ്ക്കുന്നു.
  • പ്രമേഹം നിയന്ത്രിയ്ക്കുവാൻ സഹായിയ്ക്കുന്നു.
  • ഊർജ്ജത്തിന്റെ ഉറവിടമാകുന്നു.
  • ആരോഗ്യപ്രദമായ മെറ്റബോളിക് പ്രവർത്തനങ്ങളെ സഹായിയ്ക്കുന്നു.
  • ദഹനവും പോഷകങ്ങളുടെ ആകിരണവും ത്വരിതപ്പെടുത്തുന്നു.
  • നല്ല ആരോഗ്യത്തിന് ആവശ്യമുള്ള പ്രധാനപ്പെട്ട പോഷകങ്ങൾ നല്കുന്നു.
  • മറ്റു കൊഴുപ്പുകളേക്കാൾ കുറവ് കലോറി മാത്രം നല്കുന്നു.
  • തൂക്കം കുറയ്ക്കുവാൻ സഹായിയ്ക്കുന്നു.
  • ഓസ്റ്റിയോപോറോസിസിൽ നിന്നും സംരക്ഷിയ്ക്കുന്നു.
  • വളരെ നല്ല രുചി.
  • കേടുവരാതെ വളരെക്കാലം ഇരിയ്ക്കുന്നു.
  • പാചകത്തിന് ഏറ്റവും പറ്റിയതാണ്, ചൂടിനെ പ്രതിരോധിയ്ക്കുന്നു.
  • നിങ്ങളുടെ ത്വക്കിനെ മൃദുലവും മിനുസവും ആക്കുന്നു.
  • അകാലവാർദ്ധക്യവും തൊലിയുടെ ചുളിവുകളേയും ചെറുക്കുന്നു.
  • തൊലിയിൽ വരുന്ന അർബുദത്തേയും മറ്റു രോഗങ്ങളേയും ചെറുക്കുന്നു.
  • ഒരു ആന്റിഓക്സിഡന്റായി ശരീരത്തെ സംരക്ഷിയ്ക്കുന്നു.
വെളിച്ചെണ്ണ നിങ്ങൾക്ക് ഹാനികരമാണെന്ന് ചിലർ പറയുന്നത് എന്തുകൊണ്ടാണ്?
രണ്ടാംലോകമഹായുദ്ധത്തിനു് മുമ്പു് അമേരിക്കൻ ഭക്ഷവ്യവസായത്തിൽ ഉഷ്ണമേഖലാ പ്രദേശങ്ങളിലെ എണ്ണകൾ വളരെ വ്യാപകമായി ഉപയോഗിച്ചിരുന്നു. സോയാബീൻസിന്റെ ഏറ്റവും വലിയ കയറ്റുമതിക്കാരാണ് അമേരിക്ക. അമേരിക്കൻ ഹാർട്ട് അസോസിയേഷന്റെ പിന്തുണയോടെ, അമേരിക്കക്കാരുടെ ഭക്ഷണരീതി മാറ്റുവാൻ വേണ്ടി, സാച്ചുറേറ്റഡ് കൊഴുപ്പുകൾ മാറ്റി പോളിഅൺസാച്ചുറേറ്റഡ് കൊഴുപ്പുകൾ ഉപയോഗിയ്ക്കുവാൻ, സോയാബീൻ വ്യവസായികളും ചോളവ്യവസായികളും ചേർന്ന് നടത്തിയ പ്രചാരണത്തിന്റെ അലയൊലികളാണ് 40 വർഷത്തിന് ശേഷവും നിങ്ങൾ കേട്ടുകൊണ്ടിരിയ്ക്കുന്നത്. അതിശക്തമായ പ്രചാരണത്തിന്റെ ബാക്കിപത്രം, അമേരിക്കക്കാരുടെ ഭക്ഷണരീതി മാത്രമല്ല, ലോകത്തിന്റെ തന്നെ ഭക്ഷണരീതിയെ മാറ്റിമറിച്ചു കളഞ്ഞു. അവരുടെ ആശയങ്ങൾ കുത്തിനിറച്ച വൻ പരസ്യബോർഡുകൾ അമേരിയ്ക്കയിൽ നിന്ന് വളരെ ദൂരെ കിടക്കുന്ന തെക്കൻ പസഫിക്കിലെ കൊച്ചു ദ്വീപുകളിൽ പോലും ഭക്ഷണരീതി താറുമാറാക്കി. നൂറ്റാണ്ടുകളായി നിലനിന്നിരുന്ന പരമ്പരാഗത ഉഷ്ണമേഖലാപ്രദേശങ്ങളിലെ എണ്ണകൾ ഉപേക്ഷിച്ച്, ഇറക്കുമതി ചെയ്യുന്ന പോളിഅൺസാച്ചുറേറ്റഡ് എണ്ണകൾ ഉപയോഗിച്ച് ലോകം പാചകം ചെയ്യാൻ തുടങ്ങി.

എന്നാൽ ഇന്നും ഹൃദ്രോഗവും പൊണ്ണത്തടിയും കൂടിക്കൊണ്ടേയിരിയ്ക്കുകയാണ്. പുതിയ അമേരിയ്ക്കൽ ഭക്ഷണരീതിയിൽ നിന്നും ഉടലെടുത്തതാണ് ഇന്നത്തെ പ്രശ്നങ്ങളെന്ന് മനസ്സിലാക്കുന്ന സർക്കാരുകൾ പക്ഷേ ഭാവിയിലെ ആരോഗ്യസംരക്ഷണചെലവുകളെക്കുറിച്ചോർത്ത് ആകുലപ്പെടുകയാണ്. ജനസംഖ്യയിലെ ഒരു വലിയ ശതമാനം പൊണ്ണത്തടിയന്മാരുമായി യുകെയും ആസ്ത്രേലിയായും അമേരിയ്ക്കയുടെ തൊട്ടുപിന്നിൽ തന്നെയുണ്ട്.

വെളിച്ചെണ്ണയും അതുപോലെ എല്ലാ സാച്ചുറേറ്റഡ് കൊഴുപ്പുകളും, സീറം കൊളസ്ട്രോൾ നില കൂട്ടുന്നതിനാൽ ശരീരത്തിന് ഹാനികരമാണെന്ന് കണ്ടെത്താൻ ഗവേഷണങ്ങൾ നടത്തി. പക്ഷേ ഈ ഗവേഷണങ്ങളെല്ലാം ഹൈഡ്രോജിനേറ്റ് ചെയ്ത വെളിച്ചെണ്ണയിലാണ് നടത്തിയത്. സാച്ചുറേറ്റഡോ അൺസാച്ചുറേറ്റഡോ എന്ന വ്യത്യാസമില്ലാതെ, എല്ലാ ഹൈഡ്രോജിനേറ്റ് ചെയ്ത എണ്ണകളും സീറം കൊളസ്ട്രോൾ നില ഉയർത്തും. അടുത്ത കാലത്ത് നടക്കുന്ന ഗവേഷണങ്ങൾ കാണിയ്ക്കുന്നത്, ട്രാൻസ് ഫാറ്റി ആസിഡിന്റെ സാന്നിദ്ധ്യമാണ് ആരോഗ്യപ്രശ്നങ്ങൾ ഉണ്ടാക്കുന്നത് എന്നാണ്, കാരണം, എണ്ണയുടെ ശുദ്ധീകരണ പ്രക്രിയയിൽ, അവ പ്രകൃത്യാലുള്ള രൂപത്തിൽ നിന്നും മാറ്റപ്പെട്ട ഫാറ്റി ആസിഡ് ചങ്ങലകളാണ്.

അക്കാലത്ത് തന്നെ പല ഗവേഷണങ്ങളും വിപരീതഫലങ്ങൾ കാണിച്ചിരുന്നുവെങ്കിലും, അറുപതുകളുടെ മധ്യത്തോടെ, അമേരിയ്ക്കയിൽ എല്ലാ സാച്ചുറേറ്റഡ് എണ്ണകളുടെയും കീർത്തി നശിച്ചു കഴിഞ്ഞിരുന്നു. താമസിയാതെ ഇത് മറ്റ് പടിഞ്ഞാറൻ രാജ്യങ്ങളിലേയ്ക്കു പടർന്നു.

വെളിച്ചെണ്ണയിൽ ഉള്ള ലോറിക് ആസിഡ് നല്ല ആരോഗ്യത്തിന് അത്യാവശ്യമാണ്. ഡോ. മേരി എനിഗ് പി.എച്.ഡി (ലോകത്തിലെ തന്നെ മുൻനിര ന്യൂട്രീഷനിസ്റ്റും ബയോകെമിസ്റ്റും ആണിവർ).
വെളിച്ചെണ്ണയിലെ 50 ശതമാനത്തോളം ഫാറ്റി ആസിഡും ലോറിക് ആസിഡാണ്. മനുഷ്യശരീരത്തിലോ മൃഗങ്ങളുടെ ശരീരത്തിലോ മോണോലോറിൽ ആയി മാറുന്ന ഗുണകരമായ അധികപ്രവർത്തി ചെയ്യുന്ന ഒന്നാണ്, മീഡിയം ചെയിൻ ഫാറ്റി ആസിഡായ ലോറിക് ആസിഡ്. എച്.ഐ.വി, ഹെർപിസ്, സൈറ്റോമെഗലോവൈറസ്, ഇൻഫ്ലുവൻസ, വിവിധതരം പാത്തോജനിക് ബാക്ടീരിയകൾ (ലിസ്റ്റേരിയ മോണോസൈറ്റോജിൻസ്, ഹെലിബാക്ടർ പൈലോറി, പ്രോട്ടോസോവ തുടങ്ങിയവ) എന്നിവയെ നശിപ്പിയ്ക്കുന്ന ആന്റിവൈറൽ, ആന്റിബാക്ടീരിയൽ, ആന്റിപ്രോടോസോൾ മോണോഗ്ലിസറൈഡ് ആണ് മോണോലോറിൻ. ചില പഠനങ്ങൾ ലോറിക് ആസിഡിന്റെ ആന്റിമൈക്രോബിയൽ സ്വഭാവങ്ങളും തെളിയിയ്ക്കുന്നുണ്ട്.

Friday, August 22, 2008

പ്രമേഹത്തെ നിയന്ത്രിക്കുവാൻ വെളിച്ചെണ്ണ.

ഒരു നൂറ്റാണ്ട് മുമ്പ് പ്രമേഹം കേൾക്കാൻ കൂടിയുണ്ടായിരുന്നില്ല, എന്നാൽ ഇന്ന് ഇതൊരു ആഗോളപ്രശ്നമാണ്. പ്രമേഹരോഗികൾക്ക് ധൈര്യമായി കഴിയ്ക്കാവുന്ന ഒരേയൊരു കൊഴുപ്പേ ഇന്ന് ഭൂലോകത്തുള്ളൂ, അതാണ് വെളിച്ചെണ്ണ. അത് പ്രമേഹം കൂട്ടുകയില്ലെന്നു മാത്രമല്ല, രക്തത്തിലെ പഞ്ചസാരയെ നിയന്ത്രിക്കാനും, അങ്ങിനെ രോഗത്തെ തന്നെ നിയന്ത്രിച്ചു നിർത്താനും സഹായിയ്ക്കുന്നു.

കൂടുതൽ ശാസ്ത്രീയസത്യങ്ങൾ വിശദമായി അറിയുവാൻ ഇവിടെ പോവുക.

Thursday, October 11, 2007

കിലോയ്ക്ക് 11 രൂപ വിലയ്ക്ക് കേരഫെഡ് പച്ചത്തേങ്ങ സംഭരിക്കുന്നു

തിരുവനന്തപുരം: നാളികേരത്തിന് ന്യായവില കര്‍ഷകര്‍ക്ക് നേരിട്ട് നല്‍കുകയെന്ന ലക്ഷ്യവുമായി കേരഫെഡ് കര്‍ഷകരില്‍നിന്ന് പച്ചത്തേങ്ങ സംഭരിക്കുന്നു. കിലോയ്ക്ക് 11 രൂപാ നിരക്കിലാവും സംഭരണം. കമ്പോളവിലയിലും സംഭരണവിലയിലുമുള്ള കുറവ് പരിഹരിച്ച് മെച്ചപ്പെട്ട വില ലഭ്യമാക്കുന്നതിന് ഒരു നിശ്ചിത തുക സര്‍ക്കാര്‍ നല്‍കും. ഇത് എത്രയാണെന്ന കാര്യത്തില്‍ വ്യക്തമായ തീരുമാനമായിട്ടില്ല. ഇതിനായി സബ്സിഡിയിനത്തില്‍ മൂന്നുകോടി രൂപ പച്ചത്തേങ്ങ സംഭരണത്തിനുള്ള നോഡല്‍ ഏജന്‍സിയായ കേരഫെഡിന് നല്‍കാനാണ് സര്‍ക്കാരിന്റെ ആലോചന.

കര്‍ഷകരില്‍നിന്ന് നാളികേരം വെള്ളംകളഞ്ഞ് ചിരട്ടയടക്കം വെട്ടിത്തൂക്കി നേരിട്ടാണെടുക്കുക. ഒരുകിലോയ്ക്ക് ഏകദേശം രണ്ടര നാളികേരം വേണ്ടിവരും. ഇങ്ങനെ വരുമ്പോള്‍ ഒരു നാളികേരത്തിന് 4.50 രൂപയായിരിക്കും കര്‍ഷകന് കിട്ടുക. കമ്പോളവിലയേക്കാള്‍ കുറവാണിതെങ്കില്‍ സബ്സിഡി നല്‍കി വില ഉയര്‍ത്താനാണ് സര്‍ക്കാര്‍ ഉദ്ദേശിക്കുന്നത്. സംഭരണ ചെലവായി 20 കോടി രൂപയോളം കേരഫെഡിന് മുതല്‍മുടക്കേണ്ടിവരും. നിലവിലെ സാഹചര്യത്തില്‍ കേരഫെഡിന് ഇത് അധികബാധ്യതയായതിനാല്‍ ബാങ്ക് മുഖേന വായ്പ ലഭ്യമാക്കും.

കുടുംബശ്രീ, സഹകരണസംഘങ്ങള്‍, കര്‍ഷക കൂട്ടായ്മ തുടങ്ങിയ ഏജന്‍സികള്‍ മുഖേനയാകും പച്ചത്തേങ്ങ സംഭരിക്കുക. ഇങ്ങനെ ശേഖരിക്കുന്ന തേങ്ങ അവര്‍ കൊപ്രയാക്കി കേരഫെഡിന് നല്‍കും. വര്‍ഷത്തില്‍ 5000 ടണ്‍ കൊപ്രയെങ്കിലും ഇപ്രകാരം സ്വീകരിക്കാനാണ് ലക്ഷ്യമിടുന്നത്. 3050 രൂപയാണ് ഇപ്പോള്‍ കൊപ്രയുടെ കമ്പോളവില. കേന്ദ്ര സര്‍ക്കാര്‍ ഏജന്‍സിയായ നാഫെഡ് 3620 രൂപയും നല്‍കുന്നു. കര്‍ഷകര്‍ക്ക് കുറേക്കൂടി ആശ്വാസം കിട്ടത്തക്കവിധം 3680 രൂപയ്ക്ക് കൊപ്രയെടുക്കാനും കേരഫെഡ് ആലോചിക്കുന്നുണ്ട്. കേന്ദ്ര സര്‍ക്കാര്‍ കൊപ്രയ്ക്ക് താങ്ങുവില നല്‍കുന്നുണ്ടെങ്കിലും കേരളത്തിലെ കര്‍ഷകര്‍ക്ക് കാര്യമായ പ്രയോജനം ലഭിച്ചിരുന്നില്ല. ഇവിടെ നാളികേരം കൊപ്രയാക്കി നല്‍കുന്നവരുടെ എണ്ണം നാമമാത്രമാണ്. ഈ സാഹചര്യംകൂടി പരിഗണിച്ചാണ്പച്ചത്തേങ്ങ സംഭരണത്തിന് സര്‍ക്കാര്‍ മുന്‍കൈയടുത്തത്.

കിലോയ്ക്ക് എത്ര രൂപാ നിരക്കില്‍ പച്ചത്തേങ്ങ സംഭരിക്കണം, കര്‍ഷകര്‍ക്ക് എത്ര സബ്സിഡി നല്‍കണം, നോഡല്‍ ഏജന്‍സിയായ കേരഫെഡിന് മുതല്‍മുടക്കിനുള്ള തുക എങ്ങനെ ലഭ്യമാക്കണം എന്നിവയെ സംബന്ധിച്ച അന്തിമ തീരുമാനം മന്ത്രിസഭയാണെടുക്കേണ്ടത്. അടുത്തുചേരുന്ന മന്ത്രിസഭാ യോഗത്തില്‍ പച്ചത്തേങ്ങ സംഭരണത്തിനുള്ള അനുമതി ലഭിച്ചേയ്ക്കുമെന്നാണ് സൂചന. കഴിഞ്ഞ ഇടതുമുന്നണിയോഗം ഇക്കാര്യം സര്‍ക്കാരിനോട് ശുപാര്‍ശ ചെയ്യുകയും ചെയ്തിരുന്നു. അനുമതി ലഭിച്ചാലുടന്‍ നാളികേര സംഭരണത്തിനുള്ള നടപടികളുമായി കേരഫെഡ് മുന്നോട്ടുപോകും.

കോഴിക്കോട്, ആലപ്പുഴ, കൊല്ലം ജില്ലകളിലാണ് പരീക്ഷണ പദ്ധതിയെന്ന നിലയില്‍ ഇതാദ്യം നടപ്പിലാക്കുക. വിജയമെന്നുകണ്ടാല്‍ അടുത്തവര്‍ഷം മുതല്‍ മറ്റുജില്ലകളിലേക്കും വ്യാപിപ്പിക്കും.
കടപ്പാട്‌: മാതൃഭൂമി 12-10-07

Monday, April 16, 2007

പ..ഠ്...ക്കോ...

ഹരിശ്രീ ഗണപതായ നമഃ

ഹേയ് ഞെട്ടണ്ട. നാളികേരം എന്ന ഒരു ബ്ലോഗ്ഗ്സ്പോട്ടുണ്ടാക്കി മിണ്ടാതിരികുവല്ലേ നിങ്ങള്‍. എങ്കില്‍ പിന്നെ ഞാനായിട്ടെന്തിന് മിണ്ടണം എന്നോര്‍ത്തിരിക്കുവായിരുന്നു. പക്ഷെ എനിക്ക് വയ്യട്ടാ.. അതുകൊണ്ട് ഒരു നാളികേരം ദാണ്ടേ ഇരിക്കുന്ന പീഠക്കല്ലില്‍ ഒന്ന് ആഞ്ഞുടച്ചതാ.. സംഭവം പീസ് പീസായിപ്പോയ്.. നല്ല തുടക്കം! തേങ്ങാക്കഷണങ്ങള്‍ വാരിയെടുത്തോടാന്‍ പോലും പൊന്നുകെവിയേയ് പിള്ളാരെ അറേഞ്ജ് ചെയ്തില്ലല്ലാ.. മോശായ്പ്പോയ് ട്ടാ..

ഞാനിനിയും വരും :) കരുതിയിരുന്നോ :)

Wednesday, March 28, 2007

കൊപ്ര സംഭരണം: ക്രമക്കേടിന് പഴുതുകളേറെ

മില്‍ കൊപ്ര ക്വിന്റലിന്‌ 3620 രൂപയ്ക്കും ഉണ്ടക്കൊപ്ര 3870 രൂപയ്ക്കുമാണു സംഭരിക്കുക। എത്ര കോടി രൂപ വേണമെങ്കിലും ഇതിനായി നാഫെഡ്‌ മുഖേന നല്‍കാന്‍ കേന്ദ്ര സര്‍ക്കാര്‍ തയാറാണ്‌। മില്‍ കൊപ്രയ്ക്കു വിപണിയില്‍ 3100 രൂപയും ഉണ്ടക്കൊപ്രയ്ക്കു 3325 രൂപയുമേയുള്ളു। സംഭരണം തുടങ്ങിയാല്‍ മില്‍ കൊപ്രയ്ക്ക്‌ 520 രൂപയും ഉണ്ടക്കൊപ്രയ്ക്ക്‌ 545 രൂപയും ഒറ്റയടിക്കു ലാഭം കിട്ടും. ഇതുമൂലം പല വ്യാപാരികളും വിവിധ സംഘങ്ങളുടെ പേരില്‍ വന്‍തോതില്‍ കൊപ്ര സംഭരിച്ചു ഗോഡൗണുകളില്‍ സൂക്ഷിച്ചിരിക്കുകയാണ്‌. ഇതു നാഫെഡിനു നല്‍കിയാല്‍ വന്‍ തുകയായിരിക്കും അവര്‍ക്കു ലഭിക്കുക.സംഭരണം നടത്തുന്നത്‌ 2005 സെപ്റ്റംബര്‍ മൂന്നിലെ ഉത്തരവിന്റെ അടിസ്ഥാനത്തില്‍ ആയിരിക്കുമെന്നു പുതിയ ഉത്തരവില്‍ പറയുന്നുണ്ടെങ്കിലും അന്നത്തെ ഉത്തരവിലെ പ്രധാന ഖണ്ഡിക ഒഴിവാക്കിയിരിക്കുകയാണ്‌.സംഭരണം നടത്തുന്ന സൊസൈറ്റികളെ തിരഞ്ഞെടുക്കാന്‍ കലക്ടര്‍ ചെയര്‍മാനായ സമിതി വേണം, മുന്‍പു ക്രമക്കേടു കാട്ടിയ സംഘങ്ങളേയും സാമ്പത്തിക ഭദ്രതയില്ലാത്തവരേയും ഒഴിവാക്കണം എന്നീ നിബന്ധനകളാണ്‌ ഈ ഖണ്ഡികയില്‍ ഉണ്ടായിരുന്നത്‌.പുതിയ ഉത്തരവില്‍ നിന്ന്‌ ഈ വ്യവസ്ഥകള്‍ പോയതോടെ മുന്‍പു ക്രമക്കേടു കാട്ടിയ സൊസൈറ്റികള്‍ക്കും സംഭരണത്തില്‍ പങ്കാളികളാകാം. കലക്ടര്‍ അധ്യക്ഷനായ സമിതി നിലവിലില്ലാത്തതിനാല്‍ കേരഫെഡ്‌ അംഗീകരിച്ച എല്ലാ സംഘങ്ങള്‍ക്കും സംഭരണത്തില്‍ പങ്കെടുക്കാം.എന്നാല്‍ 2000-01ല്‍ കേരഫെഡ്‌ അംഗീകരിച്ച 146 സംഘങ്ങളില്‍ 110 സംഘങ്ങളും ക്രമക്കേടു കാട്ടിയിരുന്നു. ഈ സാഹചര്യത്തില്‍ സൊസൈറ്റികളെ തിരഞ്ഞെടുക്കാന്‍ സമിതിയില്ലെങ്കില്‍ ഇക്കൊല്ലവും വന്‍ ക്രമക്കേടു നടക്കും.മുന്‍ വര്‍ഷങ്ങളില്‍ നിന്നു വ്യത്യസ്‌തമായി ഉണ്ടക്കൊപ്രയും ഇത്തവണ സംഭരിക്കുന്നുണ്ട്‌. കര്‍ഷകര്‍ ആവര്‍ത്തിച്ച്‌ ആവശ്യപ്പെട്ടിട്ടും പച്ചത്തേങ്ങ സംഭരിക്കാന്‍ ഒരു നിര്‍ദേശവും ഉത്തരവിലില്ല. കൃഷി ഓഫിസറുടെ സര്‍ട്ടിഫിക്കറ്റുമായി ചെല്ലുന്നവരുടെ കൊപ്രയേ സംഭരിക്കൂ എന്ന്‌ ഉത്തരവിലുണ്ട്‌.പക്ഷേ കൃഷിക്കാരന്‌ എത്ര ഏക്കര്‍ തെങ്ങുകൃഷിയുണ്ടെന്നും എത്ര നാളികേരം ലഭിക്കുമെന്നുമുള്ള സര്‍ട്ടിഫിക്കറ്റ്‌ മതിയാകും. സര്‍വേ നമ്പരും മറ്റും ആവശ്യമില്ല. നാളികേര കൃഷിക്കു സര്‍ട്ടിഫിക്കറ്റ്‌ നല്‍കുമ്പോള്‍ ഏക്കര്‍ കണക്കിനു പറയാറില്ല. തെങ്ങിന്റെ എണ്ണമാണു പറയേണ്ടത്‌.ഇപ്പോഴത്തെ സാഹചര്യത്തില്‍ ഇടത്തട്ടുകാരും വ്യാപാരികളും ശേഖരിച്ച കൊപ്ര വിവിധ സംഘങ്ങളിലൂടെ നാഫെഡിന്റെ ഗോഡൗണിലെത്തും. 2000-01ല്‍ 85000 ടണ്ണാണു സംഭരിച്ചതെങ്കില്‍ ഇത്തവണ അതിന്റെ ഇരട്ടി വരുമെന്നു പ്രതീക്ഷിക്കുന്നു.തമിഴ്‌നാട്ടില്‍ നിന്നു കൊപ്രയും നാളികേരവും കൊണ്ടുവരുന്നതിനു നിയന്ത്രണം ഏര്‍പ്പെടുത്തുന്നതിനെക്കുറിച്ച്‌ ഉത്തരവില്‍ ഒന്നുമില്ല. ഈ സാഹചര്യത്തില്‍ തമിഴ്‌നാട്‌ കൊപ്രയും സംഭരിക്കേണ്ടിവരും.
കടപ്പാട്‌: മലയാളമനോരമ

Tuesday, March 13, 2007

നാളികേരത്തിന്റെ ഇന്നത്തെ അവസ്ഥ

കാര്‍ഷിക സര്‍വകലാശാലയുടെ നാട്ടില്‍ ആയിരക്കണക്കിനു തെങ്ങുകള്‍ നശിക്കുന്നു. തൃശ്ശൂര്‍ ജില്ലയിലെ അന്തിക്കാട്, താന്ന്യം, ചാഴൂര്‍ പഞ്ചായത്തുകളില്‍ കുമിള്‍രോഗം പടര്‍ന്നുപിടിക്കുകയാണ്. കടദ്രവിക്കുകയും തടി ശോഷിക്കുകയും ഓലകള്‍ കുറയുകയും ചെറുതാവുകയും ചെയ്യുകയെന്നതാണ് രോഗലക്ഷണം. കുണ്ടോളിക്കടവ്, പാറളം, കോടന്നൂര്‍ ഭാഗങ്ങളില്‍ ആയിരക്കണക്കിനു തെങ്ങുകള്‍ മുമ്പേ നശിച്ചിട്ടുണ്ട്. മഞ്ഞളിപ്പ്, പട്ടകരിയല്‍, കൂമ്പുചീയല്‍ മുതലായ കേടുകള്‍ തീരദേശങ്ങളിലാകെ ബാധിച്ചിട്ടുണ്ട്. ആകെ ഉണങ്ങിയ തെങ്ങുകളും കുറവല്ല. വേനല്‍ ശക്തിപ്പെടുംതോറും രോഗാവസ്ഥയും വളരുകയാണ്. കര്‍ഷകര്‍ പരിഭ്രാന്തരാണ്. ഇന്നത്തെ നില തുടര്‍ന്നാല്‍ ജില്ലയുടെ മിക്കഭാഗങ്ങളിലും തെങ്ങുകള്‍ക്കാകെ രോഗം ബാധിക്കുമെന്ന് അവര്‍ ഭയപ്പെടുന്നു. തികച്ചും ഒരുപകര്‍ച്ചവ്യാധിയുടെ മട്ടിലാണ് രോഗം പടര്‍ന്നുപിടിക്കുന്നത്.
കടപ്പാട്‌ : മാതൃഭൂമി എഡിറ്റോറിയല്‍ 13-3-07